Daar is ‘n jong, nuwe sangsensasie van die Kaap wat die ganse musiekindustrie aan die gons gaan hê. Carlo, ‘n baie aantreklike donkerkop man, se CD, met sy naam as titel, het ‘n energieke en noemenswaardige CD met 15 snitte uitgebring wat ‘n baie breë gehoor totaal en al gaan oorrompel.

Van die eerste polsende klanke van Ek mis jou vanaand, jeuk jou voete om op te spring en die dansvloer te bestorm. Sommer gou besef jy die ritme stop nie! Daar is goeie variasie maar sonder uitsondering dra elke lied Carlo se onmisbare, uitbundige stempel – selfs Anneli van Rooyen se immer-mooi Neem my op Vlerke word getransformeer tot ‘n polsende, kloppende nommer wat jou noop om saam te sing – en hy doen dit briljant  sonder om die sensitiwiteit van die lied prys te gee. Sy stemgehalte is deurgaans onteenseglik en baie sexy, maar met Ronan Keating se This I promise you, stel hy sy veelsydigheid ten volle en met groot sukses ten toon. Dis hoendervleis mooi.

Hierdie is nie sommer net nog ‘n hier-jy sanger wat tot die mark wil toe-tree nie ...

Carlo, wat reeds vanaf 12-jaar ouderdom sing, het benewens ‘n indrukwekkende verskeidenheid diplomas en trofeë ook heelparty ander uitsoek prestasies op sy kerfstok. Terwyl hy nog op skool was, het hy die hoofrol losgeslaan in die internasionale musiekblyspel, Grease, wat in Johannesburg op die planke was. In 2001 het hy die groot eer gehad om Suid-Afrika te verteenwoordig by Mother City Records (die breinkind van Eddie Singleton, eienaar van Mowtown Records in die VSA). As voorsanger vir die groep Amy Blue, het hy sy stemvaardigheid geslyp. Daarbenewens was hy ‘n gaskunstenaar by talle optredes saam met groot name, o.a Sonja Heroldt, hy het inleiding-songs gedoen vir Nigerian Galdiators, Notorious en Vibe. En nog is het einde niet! Die besige man het ook deelgeneem aan die produksie, Duck Charles, wat die legendariese sanger Cliff Richard se loopbaan vereer het. In die agt weke wat die stuk op die planke was, het kritici net lof gehad. Nadat hy 16de geeïndig het in die plaaslike Afrikaanse Idols realiteitsprogram, het hy met hernude selfvertroue besluit om sy drome ten volle na te volg.

Die ervaring het Carlo ook aangespoor om sy toetrede tot die Afrikaanse mark te maak, aangesien die taal hom na aan die hart lê. Dit was ‘n uitstekende loopbaan besluit! Alhoewel hy ‘n luisterryke loopbaan gehad het, maak groot deure tans vir hom oop.

By 2008 se KKNK het hy die skares op hulle voete gehad, en te oordeel aan die oorweldigende reaksie, is hy stewig oppad na sukses.

Elke nommer op hierdie verrassende briljante CD is ‘n treffer. Carlo is beslis die nuwe naam om dop te hou – sy natuurlike sjarme, talent en die feit dat hy boonop aantreklik is, gaan sorg dat hy tsunami’s in die industrie veroorsaak!